جريدة أخبـــــــــار البحيره


أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

مصطفى زايد مكايد قلبى العبيط

استعرض الموضوع السابق استعرض الموضوع التالي اذهب الى الأسفل  رسالة [صفحة 1 من اصل 1]

1 مصطفى زايد مكايد قلبى العبيط في الثلاثاء يناير 03, 2012 1:12 am

قلبي العبيط
يا خسارة كنت بحبها .. والله كنت بحبها
قال إيه حسبت حياتي ضاعت قبلها مع أنها كدابة خاينة متستهلش أحبها
غميت عنيا وكنت ماشي وراها زي الضل
يمين يمين شمال شمال حارس خطاها من عيون الكل
لا فى يوم غرامها قل ولا مرة قلبي مل
رميت قلبي العبيط ما بين إيديها بكل طيبة
ونسيت كل القلوب عشان عنيها وقلت دي هي الحبيبة
معرفشي ليه صدقتها مع إني عارف إنها كدابه بس الكدب خيبة
يمكن عشان أنا كنت صح بحبها .. يمكن عشان أنا كنت
يوم محتاجلها بس الحكاية كلها بدأت وخلصت عندها ...
إسمع حكايتي وحط نفسك يوم مكاني
وأنا بعترف قدام ضميري إني فى الحب الحقيقي بكون أناني
بالذات حقيقي مش بتاع البحر أو كورنيش أو لب وسوداني
إسمع يا عم .. قالوا زمان الحب هم
والهم يبقي تقيل لو كان بيجري فى العروق والدم
قالت ومش مغصوبة .. إني بحبك إنت ودي الصعوبة
قال إيه لأنك مش بتاعي .. ولا يوم حتدخل دبلتك مرة فى صباعي
من إمتي كان الحب مرهون بالدبل
ده المستحيل ممكن يكون لو فيه أمل أصل النجاح مبيتولدش
إلاّ من الفشل والقلب لو صافي تلاقي الورد طارح فى الجبل
مش ده الأمل .. يعني إنت ما بتشفشي حد بيبتسم
مع إنه عاجز بالشلل .. مش ده الأمل
ما علينا نرجع للي باعت أغلي حب ..
للي كنت بشوف فى عنيها مرة حب ومرة كدب
للي كان الحب فوق شفايفها مسجون وإعترف
إني عمري ما شفت زيك إنت إنسان مختلف
إنت بركان م الحنان وفى حضني بس بينخدف
وأنا بعشقك .. أنا بعشقك قالتها ميت مرة بشغف
معرفشي ليه حسيت ساعتها قلبي بيتخطف
يمكن عشان إحساسي عمره ما خاني مرة .. وكنت حاسس كدبها
والكدب دايماً ينكشف منا أصلي عارف م الأساس
الحب مش كلمة وخلاص .. الحب مش ضحكة وخلاص ..
الحب مش حضن وخلاص .. الحب مش .. وخلاص ..
الحب لازم يتبني على الصدق والإخلاص
وإنتي بغباوة عملتي من قلبك جراش ووهبتي نفسك للي
يسوي واللي ما يسواش وبأجر رمزي فى البداية
لحد ما رخصّتي نفسك شئ ملوش قيمة ببلاش
منا كنت بانيلك يا حلوة السور .. حواليكي داير من بعيد ميدور
وحاطط على الأبواب سم لفيران وكلاب
وكاتب بايدي يافطة " إحذر وممنوع الإقتراب "
شلتي بإيديكي السم وإنزلتي فى السور دش
واليفطة غيرتيها وكتبتيها " بوش " push
بالعربي يعني خـــش
خنتيني مرة وقلت ياد يمكن تكون قصرت
مع إني بدّيكي أكتر ما تحلمي وأبعد ماتتمني
والتانية خونيني قال إيه أنا إتغيرت .. وأنت اللي بتخني
والتالتة ندمانة وفى الحزن غرقانة .. طب عايزه إيه مني
عدتلك الأولي والتانية عدتها .. والتالتة معقولة
معلشي فوتها منا أصلي مظلومة عشقاك ومحرومة
والدنيا سرقاني مع إني دايبة فيك بس إنت
لحد تاني ...يوووه هو إنتي فكراني
حصدقك تاني .. جرحك فى قلبي كبير
علم فى كل مكان .. وأنا دنيتي غيرك
أنا دنيتي الأحزان .. ونصيبي أكون إنسان
حتي مع اللي خان دلوقتي بس فهمت
م الدرس أنا إتعلمت قلبي ملهش مكان
وأنا بوعدك يا حب ياللي إفتكرتك ذنب
إني أسعدك بايدي .. لو حتي مع غيري
وكفاية كده تعذيب بايديك يا أغلي حبيب
أنا مش حضيّع عمري أبنيلك قصور وبروج
أنا مش حقضي حياتي أعدل فى عود معوج
ولا حتي ينفع كده أدخل فى قلب البحر عايم فى ضد الموج
سلام يا حب ومات وإبقي إفتكرني حبيب لو حتي ذكريات
وأنا مش هقول ده كان وكان وكان وكان
حقول ده كان حبيب وحفتكر أيام زمان
أيام ما كنت زمان .. أيام ما كنا بنرسم قلبين على الحيطان
يعني النهاية كده . . واضحة من الأول
لا في يوم حتتغيري .. ولا عندي نفس أكمل
والحب لو كان كده .. أنا مستحيل أتحمل
أنا بوهبك حرية فى الحب يبقي حقيقي
ومن النهرده طريقك ياحبيبتي غير طريقي
وفى النهاية لازم تعرفي .. تتأكدي إن إنتي كنتي بتعشقي
إنسان .. وبكره لما حتندمي راح تعرفي
أنا كنت بقصد إيه ... لما بقول إنسان
...............................................................

معاينة صفحة البيانات الشخصي للعضو

استعرض الموضوع السابق استعرض الموضوع التالي الرجوع الى أعلى الصفحة  رسالة [صفحة 1 من اصل 1]

صلاحيات هذا المنتدى:
لاتستطيع الرد على المواضيع في هذا المنتدى